Abbanoa: “dónnia famíllia at a pagai in média 27 eurus a su mesi”

0

Biddacidru. Funt 4682 is faturas chi ant a lompi in is dís chi benint a is clientis de sa bidda de su Campidanu de Mesu.
In arribbu in is dís chi benint is faturas cun su consumu de sa simada Argiolas – Meseladàmini 2016. Is bulletas – fait sciri s’ufíciu po is giornalis de Abbanoa – funt fatas in basi a sa letura de pagu tempus de is contadoris, cun costus mesanus po is impitadoris domésticus residentis paris a 110 eurus: in média, duncas, dónnia famíllia residenti pagat po su servítziu integrau de s’àcua 27,61 eurus a su mesi. Sa letura periódica de is contadoris e sa certificatzioni de is datus po médiu de is palmaris eletrónicus – spricant de is Ufícius de V.li Diaz – at permítiu de abasciai meda puru is bulletas cun consumus artus meda. Is operadoris de Abbanoa difatis tenint unu palmari chi permitit su càrrigamentu automàticu de is datus de is contadoris, su logu precisu innui s’agatant e sa fotografia digitali de sa letura chi is umperadoris podint domandai in calisisiat momentu a garantzia de su consumu diaderus faturau. Achirius totus is datus, Abbanoa avisat a innantis is clientis candu su consumu sodigat tres bortas cussu mesanu. Po su prus sa càusa est acapiada a pérditas chi non si bint in is impiantus de is domus: su gallegianti blocau de su serbatóiu domésticu, una pérdita asuta de su pomentu de sa pratza opuru s’àcua de su cómudu. Is datus ammostant chi sa maioria manna de is clientis avisaus at risólviu su problema a s’orígini de is consumus irregularis. A s’acabbu, po su chi pertocat is contadoris chi non si podint castiai de foras, ca funt aintru de is domus, s’est fata una faturatzioni in acontu e su pagamentu de su chi abarrat si fait apustis de àteras averiguaduras.

Annalisa Caboni  Operadora de s’Ufítziu de Língua Sarda Província Sud Sardigna, sea de Biddacidru

LASCIA UN COMMENTO